Liqeni i Bledit (sllovenisht: Blejsko jezero; gjermanisht: Bleder See, Veldeser See) është një liqen natyral i cili shtrihet në Alpet Juliane në Krahinën e Gorenjskës (Karniola e Epërme) në pjesën veriperëndimore të Sllovenisë, pranë qytetit të Bledit. Në kuadër të Liqenit dallohet Ishulli i Bledit. Zona përreth liqenit është edhe një destinacion i njohur turistik. Liqeni ndodhet 35 kilometra (22 mi) nga Aeroporti Ndërkombëtar i Lubjanës dhe 55 kilometra (34 mi) nga kryeqyteti, Lubjana.
Ishulli i Bledit (sllovenisht: Blejski otok) është ishulli i cili gjendet në Liqenin e Bledit. Në ishull gjenden disa ndërtesa ndër të cilat më kryesorja është Kisha e Shën Mërisë (Cerkev Marijinega vnebovzetja). Në formën e saj aktuale kisha është ndërtuar aty kah fundi i shekullit XVII ndërsa është zbukuruar me afreska gotike dhe është pasuruar edhe me elemente të barokut.
Kisha ka një kullë me një lartësi prej 52 m (171 ft) me shkallë baroku nga viti 1655 (me 99 shkallë guri të cilat të çojnë në ndërtesë). Kisha vizitohet shpesh ndërsa dasmat rregullisht janë organizuar atje. Tradicionalisht konsiderohet fat i mirë për dhëndrin që të bartë nusen e tij nëpër shkallë në ditën e dasmës së tyre përpara se të ndërrohen unazat dhe të shprehet dëshira, brenda kishës.
Transporti tradicional për në Ishullin e Bledit bëhet me një barkë druri e njohur si një pletna. (Fjala pletna është një huazim nga gjuha gjermane 'Plätten').
